បារាំង៖ លោក Pavel Durov ស្ថាបនិក និងជានាយកប្រតិបត្តិ (CEO) នៃកម្មវិធីផ្ញើសារ Telegram ត្រូវបានចាប់ខ្លួននៅអាកាសយានដ្ឋាន Bourget  ទីក្រុងប៉ារីស កាលពីល្ងាចថ្ងៃសៅរ៍ ទី២៤ ខែសីហាម្សិលមិញ។ នេះបើយោងតាមប្រព័ន្ធផ្សព្វផ្សាយបារាំង TF1 TV និង BFM TV ដោយដកស្រង់ព័ត៌មានពីប្រភពមិនបញ្ចេញអត្តសញ្ញាណមួយ។

សូមបញ្ជាក់ថា កម្មវិធីផ្ញើសារ Telegram គឺជាកម្មវិធីដ៏មានឥទ្ធិពលខ្លាំងនៅក្នុងប្រទេសរុស្ស៊ី អ៊ុយក្រែន និងបណ្ដាប្រទេសអតីតសហភាពសូវៀត ត្រូវបានចាត់ថ្នាក់ជាវេទិកាប្រព័ន្ធផ្សព្វផ្សាយសង្គមដ៏សំខាន់មួយបន្ទាប់ពី Facebook, YouTube, WhatsApp, Instagram, TikTok និង Wechat ។ Telegram ​មាន​គោលដៅពង្រីកខ្លួន​ឱ្យមានអ្នក​ប្រើ​ប្រាស់ដល់ ១​ពាន់​លាន​នាក់​នៅ​ឆ្នាំ​ក្រោយ។

បើតាមបណ្ដាណព័ត៌មាន TF1 បញ្ជាក់ថា លោក Durov ត្រូវបានចាប់ខ្លួននៅលើយន្តហោះឯកជនផ្ទាល់ខ្លួន ដោយលោកមានឈ្មោះក្នុងដីកាឃាត់ខ្លួនមួយរបស់សមត្ថកិច្ចបារាំង នៅក្នុងសំណុំរឿងស៊ើបអង្កេតបឋមមួយ។ ប្រភពដដែលអះអាងថា លោក Durov ត្រូវបានចាប់ខ្លួនដោយពាក់ព័ន្ធនឹងដំណើរការនៃកម្មវិធី Telegram ដែលហាក់មានភាពចន្លោះប្រហោងដែលអាចនាំឱ្យមានភាពសេរីក្នុងការអនុញ្ញាតឱ្យសកម្មភាពឧក្រិដ្ឋកម្មធ្វើឡើងតាមរយៈកម្មវិធីផ្ញើសារនេះ។ 

បច្ចុប្បន្ននេះ ទាំងកម្មវិធីផ្ញើសារបណ្ដាញសង្គម Teleram, សមត្ថកិច្ចប៉ូលិស និងក្រសួងមហាផ្ទៃបារាំងនៅមិនទាន់មានការបំភ្លឺណាមួយជុំវិញការអះអាងថាមានការឃាត់ខ្លួន CEO កម្មវិធី Telegram នេះឡើយ។ 

លោក Pavel Durov ត្រូវបានគេប៉ាន់ស្មានថាមានទ្រព្យសម្បត្តិសរុបប្រមាណ ១៥,៥ពាន់លានដុល្លារអាមេរិក ដែលកន្លងមកលោកធ្លាប់បាននិយាយថាបណ្ដាញសង្គម Telegram គួរតែជា "វេទិកាអព្យាក្រឹត" និងមិនមែនជា "តួអង្គណាមួយនៅក្នុងភូមិសាស្ត្រនយោបាយ" នោះទេ។ ដោយឡែក ស្ថានទូតរុស្ស៊ីប្រចាំប្រទេសបារាំងបានប្រាប់ទីភ្នាក់ងារសារព័ត៌មានរដ្ឋ TASS របស់រុស្ស៊ីថា ស្ថានទូតមិនទាន់ទទួលបានការទាក់ទងណាមួយពីក្រុមការងាររបស់លោក Durov បន្ទាប់ពីមានសេចក្តីរាយការណ៍ពីការចាប់ខ្លួននោះទេ ប៉ុន្តែស្ថានកំពុងចាត់វិធានការបន្ទាន់ភ្លាមៗ ដើម្បីបញ្ជាក់អំពីករណីនេះ៕